tips and tricks :) شوية حاجات


11

tips and tricks 🙂

شوية حاجات
_____________

عايزها تظبط؟!
طيب ركز شوية 🙂

منغير مقدمات ..

* أولًا كده .. الي قالك إن اليوم 24 ساعة ضحك عليك 🙂

آيوه بجد .. ضحك عليك  🙂

اليوم 22 ساعة “بس”
عارف ليه؟!
لأن في ساعتين للقرآن لازم مينقصوش دقيقة .. ممكن تقسمهم على مدار يومك .. و تقسمهم مابين قراءة/حفظ/تدبر/تفسير ..
زادوا عن ساعتين! خير و بركة ونعمة و فضل من الجميل .. المهم إنهم مينقصوش دقيقة 🙂

بركة و فضل القرآن هتستشعرها في كل لحظة في حياتك

نور و بركة و إيمان وطمأنينة وانشراح صدر و هدى و فهم و موعظة و عبرة و حكمة و رزق .. و تعليم  .. و نجاة من السوء و الشرور و رفعة مكانه في الدنيا والآخرة .. شفاعة و أمان من الغفلة و أُنس …و غيرهم كتير جدا  🙂

في أحاديث كتير و آيات في فضل القرآن و بركته  .. الجميل في الموضوع إنك تعيش التجربة  🙂

 

* عارف جو القلق .. و التوتر .. و الإنشغال .. الي احنا نايمين قايمين فيه ده؟
و مخنا الي شغال 24 ساعة و بيفكر في سبعتلاف حاجة في اليوم و الواحد لما بيجيله احباط انه مش لاحق يعمل الي نفسه يعمله و لا يحقق كل حاجة نفسه فيا و لا لاقي الوقت الي يخليه يرضى عن نفسه/شغله/علاقته بربنا/دينه /أهله و أصحابه ..
طيب عارف “السَكينة” … الهدوء .. الذهن الصافي .. البال الرايق .. القلب المرتاح ؟! أيوه الحاجات الي بتحسها (كتير/أحيانا/نادرًا /أبدًا ) برغم كل الي حواليك و بتتمنى إنها تدوم و إنك تفضل عايش الإحساس المعدِّي ده طول الوقت ؟

هفصلك هنا لحظة و أرجعك تاني .. بتصلي ازاي؟ .. شكل صلاتك ايه؟

هيئتها/تركيزك/تفكيرك/تدبرك/سرعتك/أدائك/روحك/قلبك/نفسك/جوارحك/حركاتك؟

{ وَكُلُّ شَيْءٍ عِندَهُ بِمِقْدَارٍ }

عايز سكينة؟ هدوء .. راحة بال ..

على أد ما هتركز في صلاتك .. تهتم بيها ..تسكن فيها .. تحس بإنك في لقاء و حضرة الملك سبحانه و تعالى و تقدر قيمة الدقايق الي هتؤدي فيها صلاتك .. و تتلذذ بالقرآن و هو طالع مع نفسك و بتحرك بيه لسانك و شفتك و إنت مستشعر جماله و روعته وفضله .. على أد ما هينعكس ده على حياتك .. على كل حاجة فيها ..

{يَا أَيُّهَا الَّذِينَ آمَنُواْ اسْتَجِيبُواْ لِلّهِ وَلِلرَّسُولِ إِذَا دَعَاكُم لِمَا يُحْيِيكُمْ }

__________________________________

* عارف الآية :
{ إِنَّ الصَّلَاةَ تَنْهَىٰ عَنِ الْفَحْشَاءِ وَالْمُنكَرِ ۗ وَلَذِكْرُ اللَّهِ أَكْبَرُ } ؟!

كل ما أقرأ ” ولذكر الله أكبر ”
يجي في بالي حاجات كتير .. حاجات يمكن مختلفه شوية عن تفسير الآية و معناها

و لذكر الله أكبر ..

من كل همومك ..
من كل مشاكلك ..
من كل قلقك ..
من كل ذنوبك ..
من كل مشاغلك ..

أكبر بمعنى ” أثقل”
على العصاة ..
على المتكبرين ..
على الظالمين ..
على المتجبرين ..
على المتواكلين ..

ذكر الله ( قول و فعل )
و لو لسانك تدبر كل ذكر بينطقه في كل وقت .. و في كل موقف .. قلبك و جوارحك هتكون معاه .. بتذكر ربنا في كل همسه .. و كلمه و نفس و قول و فعل و حرف .. و في كل تصرف و موقف ..

* الدعاء  🙂

و ما أدراك ما الدعاء ..

من أقل حاجة .. لأكبر حاجة بتحصل في يومك .. ليك ولـ  أهلك و أصحابك  و الناس الي بتحبهم .. إدعي بكل حاجة بتتمناها .. كل حاجة تاعباك .. كل حاجة نفسك تخلص منها .. كل حاجة نفسك تحققها .. الدعاء “ذكر”  و الدعاء .. يعني إنت فاكر الملك مدبر الأمور سبحانه و تعالى  .. عندك يقين إن هو المدبر .. متوكل عليه و سايب كل حاجة عنده و متأكد إنه قريب .. عايزلك الخير .. و متأكد إنه في كل مرحلة و موقف و حاجة بتحصل في حياتك منتظر منك حاجة ..

* الاستخارة  🙂

استخير ربنا عز وجل في أمورك كلها، وفوضه سبحانه  ..و خليك دايمًا مستعد وراضي  وعندك يقين بإن  كل قدر الله عز  وجل ليك هو الخير ..

زي ما بتقولي دايمًا صاحبتي و حبيبتي  هبة جمال ” استمتعي بأقدار الله ”  🙂

في حاجات كتير فرقت معايا الفترة الي فاتت عايزه اكتب عنها .. الصحبة و أصدقاء الطفولة و أصدقاء العمر.. القراءة .. و التركيز في القراءة في السيرة و عن الصحابة و أمهات المؤمنين و حياتهم و أيامهم .

__________________________________

عارف ” الاكتئاب” ! ؟  🙂

طبعًا مش قصدي هنا المرض النفسي ( ربنا يعافينا جميعًا  ) ، أقصد الحالة النفسية الي كلنا بنسميها اكتئاب .. كل ما نشوف حد مش على  طبيعته و نسأله مالك؟  يرد :  عندي اكتئاب 😦

طيب بيقولوا إن في 10 أعراض للاكتئاب و إن وجود 1 أو أكتر منهم معناه إن الشخص فعلًا مصاب أو عُرضة للإصابة بمرض الاكتئاب :

1. مزاج مكتئب أو حزين أو تعيس.
2. نقص واضح في الرغبة أو المتعة في كل الأشياء التي كانت تثير الرغبة أو المتعة.
3. ضعف في الشهية للطعام أو انخفاض واضح في الوزن لا يمكن تفسيره بحمية غذائية ، أو زيادة في الشهية للطعام أو زيادة ملحوظة في الوزن.
4. أرق أو ميل للنوم.
5. شعور بالتوتر وعدم القدرة على الاسترخاء أو شعور بالبطء والتثاقل الجسمي.
6. الخمول وفقدان الطاقة.
7. الإحساس بالدونية ، ولوم النفس أو الشعور بالنقص.
8. عدم القدرة على التفكير أو التركيز أو اتخاذ القرار.
9. أفكار متكررة في الموت (لا يشمل ذلك الخوف من الموت) ، أفكار انتحارية متكررة.
10. خلل في القدرة على أداء الوظائف الإجتماعية أو المهنية أو غيرها من الوظائف الأخرى.

لو “ركزت” هتعرف إن مفيش حاجة إسمها اكتئاب .. في حاجة اسمها ” ذنوب”!

هتلاقي العلاقة أساسية طردية بين و جود الأعرض دي ( زيادتها /نقصها ) و بين ( الذنوب /الأخطاء/المعاصي )

هو في حد مبيعملش ذنوب؟

مفيش .. بس في حد بيعرف غلطة و بيرجع أسرع .. بيندم .. بيصدق في التوبة و بيدعي كتير و بيطلب من ربنا العفو و المغفرة ..

و طالما عرفت يعني ايه ” اكتئاب ” يبقى انت عرفت فين علاجُة .. و عرفت ليه بيحصل .. و ليه بيزيد و امتى و ازاي بيقل و يختفي تماما و هتحس و قتها إن الدنيا مكان جميل .. “مش جنة” بس مكان جميل .. لأنه هيوصلنا لهناك .. عارف هناك؟

_________________________________

خلي طموحك في كل حاجة أعلى حاجة و أحسن حاجة و أكبر حاجة ؟! 🙂

ازاي ؟

يعني  أي حاجة بتعملها/عايز تعملها/بدأت تعملها في حياتك  .. حتى لو الحاجة دي صعبة عليك .. قدراتك فيها محدودة .. حتى لو هتقول ” أنا عارف نفسي و دي امكانياتي ”

جرب .. احلم و اشطح و اشتغل و ادعي و جاهد نفسك لحد ما توصل ..

و لو موصلتش لكل حاجة حلمت بيها هتلاقي نفسك استمتعت برحلة جميلة .. اتعلمت فيها بجد .. و حلمت بجد .. و اشتغلت بجد ..

يعني مثلًا مثلًا  ..

– لو بتعمل website خلي حلمك إنك تبقى أحسن من أحسن حد موجود .. مش في بلدك .. لأ في العالم ( يعني تنيم مارك زوكربيرج من المغرب ) 😀

– لو ههتبدأ تتعلم تجويد و تحفظ قرآن .. خلي حلمك مش إنك بس تقرأ قراءة صحيحة و جميلة و تتم حفظ القرآن ( يا رب أوعدنا 🙂 ) ، لأ خلي هدفك تكون أشطر و أحسن  من أحسن محفظ قرآن  🙂

– لو أُم و زوجة و عندك بيتك و هو كل حياتك .. خلي طموحك إنك تكوني أُم مثالية .. طيب بلاش أُم مثالية 😀

أولًا لازم تعرفي إنك بتقومي بأهم و أعظم و ظيفة و دور في الدنيا .. لازم تكوني فخورة بنفسك .. و تعرفي إنك و بيتك و أولادك دايرة صغيرة من مجموعة دواير بتكون دايرة كبيرة إسمها ” الأمة ” و إن عملك و تربيتك و تعبك ده مش بس هيأثر في حياتك/حياتهم  ده هيأثر في الدنيا كلها  🙂

{ وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا }

– لو بتشتغل في حاجة مش لاقي فيها نفسك و مش عارف تغير شغلك و مش قادر تحبه!!!  ( ابقى قولي عملت ايه) 😀

و أهم حاجة .. أهم حاجة .. لما تحقق حاجة ( جميلة/كبيرة)  .. إياك ” تركِن”  🙂

كمل .. و احلم تاني و كبر حلمك .. اتعب .. خليك متأكد دايمًا و إنت بتتعب في الحاجة الي بتعملها إن المتعة مش في الراحة . لأن الدنيا مفيش فيها راحة .. المتعة في الرحلة .. في الطريق .. في الإنجاز، وإن الراحة زي ما قال الإمام أحمد .. عند أول قدم تضعها في الجنة 🙂 ♥

. *هذا البوست قابل للزيادة و التحديث 🙂

أنا قلت اكتب شوية حاجات جت في بالي انهردة قبل ما تطير و ابقى أكمل بعدين إن شاء الله … و لو حد حابب يشارك أو يضيف اي tips و tricks 🙂 جربها خلت الدنيا تظبط يبعتلي وانا هضيفها بإسمه هنا إن شاء الله  😉

مصدر الصورة ( http://500px.com/photo/5076035)

Advertisements
هذا المنشور نشر في Uncategorized. حفظ الرابط الثابت.

رد واحد على tips and tricks :) شوية حاجات

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s